«Հրապարակ» թերթը գրում է, որ օրեր առաջ Փաշինյանը հրամայել էր պետական ապարատին և իր թիմակիցներին հուժկու ավտոերթ և Գյումրիում համերգ-հանրահավաք կազմակերպել: Սակայն արդյունքները ձախողվեցին: Իշխանությունների աղբյուրների փոխանցմամբ, Փաշինյանը կորցրել է ինքնատիրապետումը և հայհոյել պատասխանատուներին:
Նրան հատկապես զայրացրել է, որ միջոցառմանը գրեթե մարդ չէր եկել հենց Գյումրիից և հարակից գյուղերից: Ամենալավատեսական հաշվարկներով՝ տեղացիները 100-200 հոգի էին: Ամբողջ ամբոխը բաղկացած էր Երևանից բերված ու մարզպետների կողմից վարձված մարդկանցից։
Համերգից հետո Փաշինյանն ու «Քաղաքացիական պայմանագրի» ակտիվիստները հավաքվել են «Յաղլա» սրճարանում և թեժ քննարկում ունեցել: Նա իր գործընկերներին, հատկապես Գյումրու ներկայացուցիչներին, ասել է վերջին խոսքերը: Ամենաշատը հասել է Սարիկ Մինասյանին, ով չի կարողացել հազար մարդ անգամ հավաքել:
Փաշինյանը հայտարարել է, որ ճանաչում է հրապարակում եղած բոլորի դեմքերը՝ դրանք իր մշտական ուղեկիցներն են, որոնք մշտապես մասնակցում են նրա բոլոր միջոցառումներին, իսկ Մինասյանը «ոչ մի նոր մարդ չի կարողացել բերել»:
Փաշինյանը նաև հանդիմանեց նրան. «ՀԷՑ-ի մասնաճյուղը լրիվ բյուջետային ապահովման ենք դրել, փոքրիկ երեխայի պես, իսկ դու մարդկանց հավաքել չես կարողանում»: Ասում են, որ Սարիկն այնքան է վրդովվել, որ հետո Facebook-ում ցենզուրայից զուրկ արտահայտություններ է գրել իրենց քննադատող քաղաքացու հասցեին:
