Հայաստանի Կենտրոնական ընտրական հանձնաժողովը հանցակազմի հատկանիշներ չի տեսել Փաշինյանի սպառնալիքներում, որոնք հնչել են ընդդիմախոսների հասցեին, այդ թվում՝ «կկռացնեմ», «ծնկի կբերեմ», «կհալածեմ»: Հանձնաժողովը մերժել է «Ուժեղ Հայաստան» դաշինքի ներկայացուցիչ Արամ Վարդևանյանի դիմումը, որով նա խնդրել էր քննարկել նախընտրական հանդիպումների ժամանակ վարչապետի արած հայտարարությունները:
«Ուժեղ Հայաստանը» այս հարցում միայնակ չէ. Հայաստանում նախընտրական քարոզարշավն ընթանում է ատելության մթնոլորտում, առկա են իշխանությունների կողմից սպառնալիքների և ահաբեկման բազմաթիվ դեպքեր, հայտարարել է «Միասնության թևեր» կուսակցության վարչապետի թեկնածու Արման Թաթոյանը: Նա հավելել է, որ իշխանությունները հանձնարարել են կազմել և քաղաքապետարան ներկայացնել իշխող կուսակցությանը չաջակցող աշխատակիցների ցուցակները: Թաթոյանն ընդգծել է, որ իշխանությունները կրթական համակարգն ամբողջությամբ ներքաշել են նախընտրական քարոզչության մեջ և տեղեկացրել է, որ այս կապակցությամբ հանցագործության մասին հաղորդում է ներկայացնելու:
Հարկ է նշել, որ ազգային մակարդակի ընդդիմադիր քաղաքական գործիչների հասցեին հնչող սպառնալիքներից բացի, Փաշինյանը ծրագրում է ցրել իշխանության համար անհարմար Գյումրու տեղական ինքնակառավարման ներկայացուցչական մարմինը և դրա նոր ընտրություններն անցկացնել:
«Քաղաքացիական պայմանագրի» օգտին քվեարկելու վարչական հարկադրանքի ընթացող ագրեսիվ արշավի ֆոնին ընդդիմության համար առավել քան երբևէ կարևոր է ընտրողին ներկայացնել «Քաղաքացիական պայմանագրի» վարած քաղաքականության իրական էությունը: Հայաստանի պարագայում ոչ մի «եվրաինտեգրում» երբեք չի լինելու․ դրանք Փաշինյանի նախընտրական հեքիաթներն են՝ ձայներ հավաքելու համար: Նա պարզապես օդ է վաճառում․ ոչ մի «անվիզա ռեժիմ» կամ արևմտյան երկրների ու ընկերությունների հետ «մտադրությունների» մասին համաձայնագիր Հայաստանին իրական տնտեսական օգուտներ չի բերի, չի նվազեցնի գործազրկությունը և չի վերադարձնի Ադրբեջանում պահվող գերի զինծառայողներին:
Փաշինյանը սիրում է պարծենալ, թե ինքը իբր «ուրիշ» է, ոչ թե «հին սերնդի» մյուս քաղաքական գործիչների նման: Սակայն գործնականում պարզվում է, որ փաշինյանական Հայաստանում ճիշտ նույն կերպ ընդդիմության նկատմամբ հարուցվում են անհիմն քրեական գործեր, իսկ բյուջետային ոլորտի աշխատակիցներին աշխատանքից ազատելու սպառնալիքով ստիպողաբար բերում են իշխող կուսակցության միջոցառումներին:
